Arsenal liggur greitt á fyrstaplássinum í Premier league – 8 stig frammanfyri Manchester City og 9 stig frammanfyri Manchester United. Men eftir sigurin hjá Manchester United í grannauppgerðini í móti Manchester City, torir Manchester United miðverjin, Raphael Varane, at droyma um at Meistaraheitið aftur endar í Old Trafford.
- Alt er møguligt. Men vit taka ein dyst at gangin. Har eru nógvir dystir eftir at spæla og tað verður trupult, sigur franskmaðurin.
- Tað kennist sum at spæla ein stóran Champions League dyst hvørja viku. Leikferðin er høg og allir leikarnir eru sera væl fyri.
Manchester United hevur leikt 18 av 38 Premier League dystum. Næsta uppgerðin er á útivølli í móti Crystal Palace í morgin, áðrenn stóra brakið í móti Arsenal komandi sunnudag.
Sigursvanda Manchester United hevur ikki vunnið Premier League síðan Sir Alex Ferguson takkaði fyri seg fyri tíggju árum síðan.
Arsenal hevur ikki vunnið meistaraheitið síðan 2004 tá felagið, sum tað einasta felagið í Premier League søgu, fór ósigrað gjøgnum kappingarárið.
