Í samband við kommunuvalið, sum verður í november, hevur Dimmalætting sett øllum borgarstjórum í landinum nakrar spurningar.
Her svarar Hans Jóhann Sørensen, borgarstjóri í Kvívíkar kommunu:
Hvat avrik í hesum valskeiðnum er tú fegnast um?
- At útstykkingarnar í Leynum og Kvívík eru lidnar, at skúlin, svimjihylurin og kommunuskrivstovan eru knýtt í vatnturbinuna, og at arbeitt verður við kloakkini í Kvívík.
Hvat mál, sum ikki eydnaðist at loysa í hesum valskeiðnum, iðrar tú teg mest um?
- At tað ikki er komið á mál við einum vinnuøki, og at tað ikki er eydnast at gera betri karmar fyri frítíðarvirksemi hjá ungu borgarunum.
Hvat er størsta málið, sum er fyri framman, í komandi valskeiði?
- At fáa bygt okkurt á planeraða økið, har undanfarna bygdaráð ætlaði at byggja demensheim.
- Eldri parturin av skúlanum í Kvívík stendur fyri eini dagføring og vaksandi barnatalið ger at hølir fara at mangla.
- Eisini skulu útstykkingar gerast.
Stillar tú upp aftur á komandi kommunuvali?
- Ja.
