Hesir vunnu stórsigur á Malta í dag. F.v. Helgi Dam Ziska, Høgni Egilstoft Nielsen, Rógvi Egilstoft og John Rødgaard
Uppreisn og stórsigur móti Malta
So bragdaði aftur hjá føroyska talvlandsliðnum á olympiaduni í India
Suni Merkistein - Talvsamband Føroya
8. august 2022 kl. 15:32
Í tíggjunda og næstsíðsta umfari í dag vunnu Føroyar heili 3½-½ á Malta. Sigurin var ógvuliga kærkomin eftir heldur slakan byr í seinastu dystunum.
Helgi Dam Ziska, Høgni Egilstoft Nielsen og Rógvi Egilstoft vunnu allir, og á fjórða borði telvaði John Rødgaard remis.
Føroyar eru styrkismettar væl fremri enn Malta, men seinastu dagarnar hava vit javnan sæð, at favorittleikluturin kann vera svikaligur. Vit plaga annars at vinna á Malta, bæði í OL og í kappingini fyri smátjóðir í Evropa.
Hvussu langt fram í røðina Føroyar vinna seg við hesum sigri fæst at síggja seinni í dag, tá ið allir dystir eru lidnir, og støðan verður gjørd upp. Tá fæst eisini at vita, hvørjum landi telvast skal ímóti í seinasta umfari í morgin.
