Tvær kvinnur úr umhvørvisfelagsskapinum Just Stop Oil hava blakað tomatsuppu á ein málning hjá heimskenda listamanninum Vincent van Gogh, ið hongur í National Gallery í London.
Talan er um málningin Sunflowers, ið van Gogh málaði í 1888. Málningurin hevur eitt virði á umleið 72.5 milliónir pund, sum svarar til slakar 620 milliónir danskar krónur. Eftir hendingina límaðu tær aðra hondina fasta á veggin.
Fleiri filmsbrot av hendingini eru í umferð á netinum. Á brotunum rópar onnur kvinnan:
- Hvat hevur størri virði: list ella lív? Hevur list størri týdning enn matur? Meir enn rættvísi? Eru tit meir áhugað í at verja ein málning, klótuna ella menniskjuni?
National Gallery hevur lagt fylgjandi boð á Twitter:
- Stutt eftir kl. 11 í morgun [fríggjamorgunin, red.] komu tvey fólk inn í rúm 43 í National Gallery (...) Ramman hevur fingið lítlan skaða, men ikki sjálvur málningurin. Tvey fólk eru handtikin.
Løgreglan í London hevur somuleiðis boðað frá, at yvir 100 mótmælisfólk eru handtikin seinastu dagarnar. Harímillum fleiri viðhaldsfólk frá Just Stop Oil, ið forðaðu ferðsluni rundan um parlamentið.
