Tvær koppsetingar geva atgongd til steypafinalurnar

Stóra finaluvikuskiftið í hondbólti byrjar í dag, men orsaka av koronatilmælunum verða ikki eins nógvir áskoðarar, sum vanliga hava verið.

Hondbóltssambandið hevur avgjørt, at tey feløgini, sum eru umboðaði í finalunum, hava fingið eitt avmarkað tal av atgongumerkjum til hvørja finalu. Feløgini velja sjálvi hvør skal hava møguleika at keypa atgongumerki til finalurnar.

Fólk við tveimum koppsetingum sleppa eisini

Í dag boðar HSF frá, at nøkur onnur eru, sum kunnu keypa atgongumerki til finalurnar.

- Tey, sum eru koppsett tvær ferðir fyri korona, og í minsta lagi átta dagar eru farni, síðani seinnu koppsetingina, kunnu, við at vísa sítt koppsetingarkort fram, frítt keypa atgongumerki til steypafinalurnar í Høllini á Hálsi í vikuskiftinum, skrivar HSF á heimasíðuni.

Stórt kjak í limalondunum í Evropa Samveldinum

Avgerðin nemur við stóra kjakið kring Evropa, um hvørt man skal gera mun á teimum borgarum, sum eru liðugt koppsettir, og teimum, sum ikki eru.

Í fleiri evropeiskum londum verður tosað um man skal gera eitt koronapass, sum borgarar, sum eru liðugt koppsettir, kunnu fáa, so at hesi fáa kunnu fara á kaffistovur, út at eta, í biograf, og í hesum førinum, til steypafinalur í hondbólti.

Meðan summi halda at hetta er eitt gott hugskot og ein sjálvfylgja, halda onnur, at við hesum verður gjørdur munur á borgarum – at borgarar tá verða býttur í a-borgarar og b-borgarar.

Hvussu er og ikki, so sleppa tey, sum eru liðugt koppsett, at njóta stemningin í Høllini á Hálsi um vikuskiftið, nú stepafinalurnar í hondbólti verða spældar.