Í gjárkvøldið varð boðað frá, at tað var ómetaliga hált fleiri staðni, men løgreglan hevur bara kunnleika til tvey ferðsluóhapp.
Bæði vóru í Eysturoynni.
Beint fyri midnátt í gjárkvøldið hendi eitt ferðsluóhapp á vegnum við Rituvík. Talan var um ein bilførari, sum misti tamarhaldið á bilinum og fór á glið, út av vegnum.
Hann rakti eitt skáp hjá Sev, og ein hjall. Bilurin fekk stóran skaða, og el-skápið og hjallurin fingu eisini nakað av skaða.
Men ein avleiðing av óhappinum var, at trý hús mistu streymin, so fólk frá Sev máttu upp í leikin.
Bilførarin, sum var einsamallur í bilinum, fór á Landssjúkrahúsið til kanningar, men hann var sloppin við skrekkinum.
Stutt eftir fór ein annar bilur út av Millum Fjarða, hann skuldi snara av Oyndafjarðarvegnum, inn á høvuðsvegin, men tað var so hált, at hann gleið út av og stóð fastur í rununi. Sostatt má hann sleipast leysur aftur, og tað skuldu tey fara í holt við nú í morgun.
