Í kvøld rinda føroysku U-21 landsliðsspælararnir møðina í Sarajevo, áðrenn teir tíðliga í morgin fara úr Kroatia og í annaðkvøld lenda aftur í Føroyum. So verður fokus vent ímóti heimadystinum ímóti Grikkalandi, sum týsdagin verður í Klaksvík.
Tað er greitt, at tríggir av teimum, sum í kvøld vóru millum teir fyrstu ellivu, ikki vera á liðnum týsdagin, tí teir eru leikbannaðir. Talan er um verjuálitið Gullbrand Øregaard, sum í kvøld sá reytt og tí er leikbannaður, og um liðformannin Noah Mnenéy og verjuspælaran Elias Rusborg. Teir báðir síðstu sóu gula kortið í kvøld, og tað ber leikbann við sær.
Leikbannini raka sera meint, tí frammanundan er Áki Johannesen, sum hevur verið verjuálit, skaddur, og Samuel Johansen Chukwudi var í síðstu úttøku fluttur úr U-21 hópinum og upp í A-landsliðshópin.
Eyðun Klakstein landsliðsvenjari harmast um, at tað ikki eydnaðist at vinna úrtøku í kvøld, tí hann heldur, at avrikið var gott:
-Vit vístu stóran stríðsvilja allan dystin, eisini tá ið tað gekk ímóti, og í løtum løgdu vit trýst á Kroatia. Vit høvdu nógvar støður í teirra brotsteigi, onkrar málmøguleikar, og tríggjar ferðir bjargaði málmaðurin hjá teimum væl, sigur Eyðun Klakstein, og han heldur fram:
– Vit manglaðu tann seinasta neyvleikan fyri at fáa stig, men vit vóru ikki langt frá tí hesaferð. Tí iðra vit okkum í kvøld. Vit vórðu feldir av tveimum ivasomum brotsspørkum, men tað fáa vit ikki gjørt so nógv við. Okkara fokus verður at hyggja eftir tí, sum vit kunnu betra, og styrkja tað, sum vit eru góðir til. Vit hava tríggjar dystir eftir at spæla í hesari undankappingini, og vit eru ikki lidnir at vinna stig.
– Nú gleða vit okkum til heimadystin ímóti Grikkalandi í Klaksvík týsdagin. Vit verða til reiðar at geva alt fyri at fáa tað góða úrslitið, og vit vóna, at nógv fólk koma at stuðla okkum, tí tað ger mun.
