Tríggiar grannauppgerðir vera í dag

Í dag verður farið undir annan triðing í ársins landskapping í fótbólti.

Tríggjar grannauppgerðir eru á skránni – HB – B36, 07 Vestur – EB/Streymur og Víkingur – NSÍ.

Víkingur er topplið, men tað er av álvara spenningur bæði í toppinum og botninum. HB hevur sama stigatal sum Víkingur, og KÍ er trý stig aftanfyri oddaliðini.

Serliga týdningarmikil er oyggjauppgerðin í Fuglafirði. Í fyrsta triðingi eydnaðist tað ikki at vinna fulla úrtøku hjá ÍF og B68, sum hava tvey stig. Fyri fáum døgum síðani endaði uppgerðin millum B68 og ÍF á Svangaskarði við málleysum javnleiki.

B36 hevur ikki vunnið fulla úrtøku, síðani Dan Brimsvík í 2020 tók við venjarastarvinum í B36. Fyri tveimum vikum síðani var tað tætt við, tá ið tað endaði við 2-1 HB sigri. B36 javnaði tíðliga í seinna hálvleiki til 1-1, og B36 hevði fleiri møguleikar at leggja seg á odda, áðrenn HB átta minuttir undan leikloki skoraði sigursmálið.

07 Vestur legði bragdliga fyri, men síðstu ferðirnar hevur tað verið meiri soltið. Ein av teimum trimum sigrunum í landskappingini var á heimavølli ímóti EB/Streymi, sum fór av Dungasandi við 4-2 tapi. Tá ið liðini hittust við Margáir í steypakappingini vann EB/Streymur 5-0.

Oddaliðið Víkingur fær vitjan av NSÍ, sum í 9. umfari vísti sannførandi avrik og vann 4-1 á heimavølli ímóti 07 Vestur. Mánakvøldið tapti Víkingur fyri fyrstu ferð í næstan eitt ár, tá ið tað endaði við 2-1 tapi í Klaksvík.

Síðsti dysturin í 10. umfari verður í annaðkvøld, tá ið Skála fær vitjan av KÍ.  

Í dag:

ÍF – B68: Rúni Olsen kl. 15.00

Víkingur – NSÍ: Jóhan Hendrik Ellefsen kl. 17.00

07 Vestur – EB/Streymur: Dagfinn Forná kl. 15.00

HB – B36: Kári J. á Høvdanum kl. 17.00

Í morgin:

Skála – KÍ: Áki Leitisstein Hansen kl. 19.00