Í kvøld hevur B68 skrivað undir sáttmála við nýggjan málverja.
Talan er um Tórð Thomsen, sum seinastu fimm árini hevur umboðað NSÍ.
B68 skrivar soleiðis í kvøld:
B68 hevur í kvøld gjørt avtalu við sterka og rutineraða málverjan, sum hevur vunnið FM fýra ferðir.
Um skiftið til B68 sigur Tórður:
- Eg og Jákup á Borg hava samskift í eina tíð nú. Eg kenni væl Jákup og restina av venjaratoyminum í B68, og tað hevur heilt sikkurt verið ein týdningarmikil faktorur í avgerð hjá mær.
Tórður Thomsen er 36 ára gamal, og hann hevur sambært faroesoccer.com spælt 344 dystir í bestu landskappingini:
- Tá man kemur í mín aldur sum fótbóltspælari, so eru tað nógvir spurningar, sum man skal spyrja seg sjálvan, og hóast eg leingi havi verið í iva um, hvat eg ætli mær, so følist hetta sum tann heilt rætta avgerðin, tí á Svangaskarði er møguleiki fyri menning sum spælari, venjari og týdningarmest av øllum sum persónur, sigur Tórður Thomsen við B68 heimasíðuna.
Og hann heldur fram:
- B68 er eitt felag og eitt lið í menning, sum hevur høgar ambitiónir, eitt sera sterkt venjaratoymi, ein góðan og hartarbeiðandi felagsskap og millum bestu umstøður í landinum.
Um leiklutin hjá Tórði Thomsen á Svangaskarði sigur B68 hetta:
Tórður fer at hava eina sokallaða "multi-funktión" í felagnum, sum inniber, at hann verður málverji, og hann fer eisini at vera í venjaratoyminum hjá Jákupi á Borg.
Hetta er triðja ferðin, at Tórður Thomsen fer at umboða B68. Hann var á Toftum í 2006, tá ið B68 endaði á 9. plássi, og hann var aftur á Svangaskarði í 2011, tá ið B68 endaði á sætta plássi.
