Í morgin, mikudagin, fara Aksel V. Johannesen, løgmaður, Høgni Hoydal, landsstýrismaður í uttanríkis- og vinnumálum, og Ruth Vang, landsstýriskvinna í fíggjarmálum, til Keypmannahavnar. Á skrá eru tveir fundir, bæði ein ríkisfundur og ein fundur í samstarvsráðnum.
Vanliga eru ríkisfundur og fundur í samstarvsráðnum um summarið. Á fundunum, sum vórðu í Nuuk í summar, varð tó avtalað, at Føroyar, Danmark og Grønland framyvir skulu royna at hittast tvær ferðir um árið. Tí verður skipað fyri ávegis ríkisfundi og samstarvsráðsfundi longu nú í januar.
Londini skiftast um at vera vertir fyri fundunum, og við ársbyrjan tók Danmark yvir formansskapin frá Grønlandi. Regluligi ríkisfundurin og fundurin í samstarvsráðnum verða í Danmark síðst í juni í ár.
– Tað hevur týdning, at Føroyar, Danmark og Grønland møtast regluliga á ráðharrastigi, sigur Aksel V. Johannesen, løgmaður, í tíðindaskrivi.
Trygdarpolitiska støðan í heiminum gerst alsamt meiri spent, bæði við krígnum í Ukraina, og við krígnum í Miðeystri.
Fundirnir eru eitt gott høvi at tosa saman um støðuna, og hvussu hetta ávirkar samstarvið millum londini, sigur Aksel V. Johannesen.
Á ríkisfundinum eru Aksel V. Johannesen, løgmaður, danski forsætisráðharrin, Mette Frederiksen, og grønlendski landsstýrisformaðurin, Múte B. Egede. Á fundinum fara tey trý at umrøða samstarvið í ríkisfelagsskapinum og at kunna um búskaparligu og politisku gongdina í londunum.
Síðani verður fundur í samstarvsráðnum, har eisini landsstýrismaðurin í uttanríkis- og vinnumálum og landsstýriskvinnan í fíggjarmálum, eru við, saman við øðrum donskum og grønlendskum ráðharrum. Á fundinum skulu londini umrøða uttanríkis- og trygdarpolitisku støðuna, umframt samstarvið millum londini og samstarvið í Arktiska ráðnum.
Tey, sum eru við á fundinum í samstarvsráðnum eru:
Fyri Føroyar
Aksel V. Johannesen, løgmaður
Høgni Hoydal, landsstýrismaður í uttanríkis- og vinnumálum
Ruth Vang, landsstýriskvinna í fíggjarmálum
Fyri Danmark
Mette Frederiksen, forsætisráðharri
Lars Løkke Rasmussen, uttanríkisráðharri
Troels Lund Poulsen, verjumálaráðharri
Peter Hummelgaard, løgmálaráðharri
Fyri Grønland
Múte B. Egede, landsstýrisformaður
Vivian Motzfeldt, landsstýriskvinna í uttanríkis- og sjálvstýrismálum
Naaja H. Nathanielsen, landsstýriskvinna í vinnu-, ráðevnis-, lógar- og javnstøðumálum
