Farna mánadag kunngjørdi Håkan Ericson, A-landsliðsvenjari hjá monnum, hópin til dystirnar í UEFA Nations League, sum eru á skránni juni mánað. 23 spælarar eru í fyrstu atløgu boðsendir, og síðan er ætlanin at úttaka ein afturat seinni í vikuni.
Millum teirra var Teitur Matras Gestsson úr HB, ið higartil er skrásettur fyri 19 A-landsdystir fyri Føroyar. Men nú er greitt, at føroyska liðið má klára seg uttan Teit á hesum sinni.
Teitur Matras Gestsson hevur ein lítlan skaða at dragast við, og hevur tískil givið avboð. Í staðin hevur Håkan sent boð eftir Kristiani Joensen úr EB/Streymi, skrivar heimasíðan, fsf.fo.
A-landsliðið skal spæla fýra dystir í juni mánað. Teir eru móti Turkalandi, Litava og tvær ferðir móti Luksemborg:
4. juni Turkaland – Føroyar (klokkan 19:45)
7. juni Føroyar – Luksemborg (klokkan 19:45)
11. juni Føroyar – Litava (klokkan 17)
14. juni Luksemborg – Føroyar (klokkan 19:45)
Heimasíðan hjá Fótbóltssambandinum skrivar, at í løtuni eru umleið 1.500 atgongumerki seld til heimadystirnar móti Luksemborg og Litava.
Kelda: Hans Erik Danielsen/fsf.fo
