Team Mira danmarksmeistari
Team Mira hjá Havnar Fimleikafelag hevur í dag vunnið DM í estetiskum fimleiki.
Katrin Erlendsdóttir
29. mai 2022 kl. 14:06
Um vikuskiftið hevur Team Mira verið í Danmark og kappast um danmarksmeistaraheitið í estetiskum fimleiki. Eftir finaluna í dag stendur greitt, at føroyska liðið hjá Havnar Fimleikafelag gjørdist vinnari og harvið danmarksmeistari.
Team Mira lá fremst aftaná undankappingina í gjár, og tí var sera stórur spenningur til finaluna í bólkinum børn 12-14 í dag, sum tað altso eydnaðist at vinna.
Team Mira hjá Havnar Fimleikafelag vann DM við 32,635 stigum. Á øðrum plássi var Team Viviant hjá Greve Gymnastik og Trampolin við 32,465 stigum, meðan Team Merida hjá Espergærde IF endaði á triðja plássi við 31,565 stigum.
Mynd: Havnar Fimleikafelag
