Tað vóru tveir stórir dagar í Spania

Tað er gott lag í landsliðsleguni í Spania. 4-0 sigurin ímóti Liktinstein, sum er størsti sigur yvirhøvur á útivølli, er kærkomin styrkur, nú Håkan Ericson og hansara menn fyrireika seg til týskvøldið at spæla á Brøndby stadion ímóti Danmark.

Fríggjakvøldið vóru tað tveir spælarar, ið høvdu stórar dagar á landsliðnum.

Annar var Klæmint A. Olsen, sum fyri 60. ferð var á landsliðnum. Klæmint er 13. spælarin, sum røkkur 60 landsdystum. Tað vera skjótt 12 ár síðani, at Klæmint fyrstu ferð var í landsliðstroyggjuni. Tað var 7. september í 2012, tá ið Føroyar í Hannover taptu 3-0 ímóti Týsklandi. Fimm minuttir undan leikloki avloysti Klæmint A. Olsen Jóan Símun Edmundsson.

Klæmint hevur skorað 10 mál á landsliðnum. Hann er undir liðini á Rógvan Jacobsen, sum setti metið 21. november í 2007, tá ið Føroyar taptu EM undankappingardyst 3-1 í Modena í Italia.

Klæmint skoraði fyri 10. ferð 15. november í 2021, tá ið Føroyar taptu HM undankappingardyst 3-2 í Netanya í Ísrael. Síðani hevur Klæmint spælt við í 16 landsdystum, og tað er ein spurningur um tíð, áðrenn tað fer at eydnast NSÍ spælaranum at taka málmetið.

René Shaki Joensen var fríggjakvøldið fyri 50. ferð á landsliðnum. Hann er 26. føroyski landsliðsspælarin, sum røkkur 50 landsdystum. René Shaki Joensen umboðaði Brøndby IF, tá ið hann í vinadysti ímóti Íslandi á Laugardalsvøllinum í Reykjavík mikudagin 15. august í 2012 varð skiftur inn á liðið. Í 71. minutti avloysti René Jónas þór Næs. Ísland vann 2-0.

René hevur skorað trý mál á landsliðnum, og hann er 26. føroyingurin, sum hevur umboðað føðilandið 50 ferðir á landsliðnum í fótbólti.

Kelda: FaroeSoccer