Tað gerst alt styttri millum bilarnar

Ferðslan í undirsjóvartunlunum økist stútt og støðugt. Í juni var ferðslan væl minni, enn hon hevði verið undanfarnu mánaðirnar. Tað komst av, at tað var verkfall.

Nú tunnil.fo hevur kunngjørt tølini fyri ferðslu í juli er skjótt at staðfesta, at í øllum undirsjóvartunlunum koyrdu tað í juli í ár fleiri bilar, enn tað gjørdu í juli undanfarnu árini.

Á talvuni sæst, at størsta ferðslan í undirsjóvartunlum er í Eysturoyartunlinum. Millum Eysturoy og Streymoy koyrdu tað í juli í ár 5374 bilar. Tað er  í miðal 406 bilar fleiri um dagin, enn tað koyrdu í juli í 2023. Millum Rókina og Strendur koyrdu tað 817 bilar í miðal um dagin í juli í ár. Í juli í fjør koyrdu 688 bilar ella 129 bilar færri.

Í Norðoyatunlnum var miðaltalið í juli í ár 4414, og í fjør var tað 4123 ella 291 bular færri enn í juli í ár.

Í Vágatunlinum var miðaltalið í juli í ár 3800. Í fjør var tað 3619 ella   181 bilar færri í miðal um dagin enn í ár.

Í Sandoyartunlinum veksur ferðslan støðugt. Í juli í ár var ferðslan 1194 bilar um dagin. Hetta er størsta miðaltalið, síðani tað fyrsta mánaðin var ókeypis at koyra. Í februar var talið 783, í mars 919, í apríl 933, í mai 960, í juni 876 og í juli var miðaltalið 1194 bilar um dagin.