Sumbingar fingu stórfingna jólagávu
Verkið um sumbingar varð undan jólum borin øllum húsarhaldum í kommununi
Jóannes Hansen
25. desember 2023 kl. 15:00
1334 síður. Tað var gávan, sum Sumbiar kommuna undan jólum bar øllum húskjunum í kommununi.
Talan var um Saga sumbinga, ið er eitt stórt bókaverk í trimum bindum. Tað bleiv lagt fram í samkomuhúsinum í Sumba fríggjadagin 8. desember.
Høvundurin er Beinar Vestergaard úr Steinhúsinum í Sumba, sum í mong ár hevði bilasølu og bilverkstað í Havn – fyrst á Boðanesi og seinni í Hoyvík.
SAGA SUMBINGA er í trimum bindum. Tað fyrsta snýr seg um Sagnir, søgur og mentan í Sumbiar sókn. Annað bindið er um Hús og fólk í Sumba, og triðja bindið er um Sagnir, søgur, hús og fólk.
Í sumbiar kommunu eru bygdirnar Sumba, Lopra, Akrar og Víkabyrgi, og fólkatalið var í november og sambært hagstovuni 333.
