Í sambandi við søluni av átta grundstykkjum í Nes kommunu fyrr í dag, sum gingu sum heitt breyð, spurdu vit borgarstjóran í kommununi, Súna í Hjøllum, um hetta fer at hava við sær, at fleiri grundstykki vera at fáa í nærmastu framtíð?

Súni svarar, at tey ta seinastu tíðina hava merkt áhuga fyri grundstykkjunum.

– Men at tað var so stórur áhugi, tað fer væl at gera, at býráðið beinanvegin má taka støðu til, hvussu skjótt vit halda fram við at útstykkja fyri sethúsagrundstykkjum har í økinum.

Annars verður eitt 3-4000 fermetra stórt grundøki, ætlað til íbúðarbygging í økinum við Høganesvegin, liðugt planerað út á várið – og verður síðan alment boðið út.

Somuleiðis verður eitt 4000 fermetra stórt grundøki við Regnavegin, sum verður ætlað til íbúðarbygging, væntandi liðugt planerað næsta summar. Tað verður eisini boðið út alment.

Fólkatalið er vaksið skjótt í Nes kommunu seinastu árini, og tað er hugaligt.

Tað er eisini ein spennandi tíð fyri framman, og býráðið í Nes kommunu fer framhaldandi at arbeiða fyri trivnaði, framburði og burðardyggari menning við skilagóðari fíggjarstýring, sigur borgarstjórin.