Í samband við kommunuvalið, sum verður í november, hevur Dimmalætting sett øllum borgarstjórum í landinum nakrar spurningar.
Her svarar Heðin Mortensen, borgarstjóri í Tórshavnar kommunu:
Hvat avrik í hesum valskeiðnum er tú fegnast um?
- Tað eru nógv, ein kundi nevnt, t.d. Tórshavnar havn, stóra útstykkingin á Argjum, langhylurin, Havnará og stórhøllin við Tjarnir, men innkomuvegurin og Húsareynstunnilin er helst størsta einstaka avrikið, tí vegurin fær so ómetaligan týdning fyri at lætta um ferðslutrýstið í býnum, samstundis sum stór øki verða tøk til bústaða- og vinnubygging.
Hvat mál, sum ikki eydnaðist at loysa í hesum valskeiðnum, iðrar tú teg mest um?
- Einki.
Hvat er størsta málið, sum er fyri framman, í komandi valskeiði?
- Útstykkingar og umhvørvið.
Stillar tú upp aftur á komandi kommunuvali?
- Tað havi eg ikki tikið endaliga støðu til. Uppstillingin er ikki byrjað enn.
(Dagføring: Heðin Mortensen hevur síðani hann svaraði okkum, kunngjørt, at hann stillar upp aftur)
