Jens Stoltenberg, núverandi Nato-aðalskrivari, hevur takkað nei til starvið sum nýggjur stjóri í norska sentralbankanum.
Tað váttar hann fyri norska Dagblaðnum.
– Eg havi upplýst Fíggjarmálaráðnum (norska, red.), at eg sigi starvið sum sentralbankastjóri frá mær, sigur hann við Dagbladet.
Avgerðin kemur í kjalarvørrinum av, at Stoltenberg hevur játtað seg til at taka eitt ár afturat sum Nato-aðalskrivari.
– Nato hevur brúk fyri einum aðalskrivara, ið ikki er á veg í annað starv, serliga ikki nú, sigur Stoltenberg, sum sipar til russisku innrásina í Ukraina.
Hann leggur samstundis upp til, at hann verður sitandi sum aðalskrivari í Nato í meira enn eitt ár afturat.
– Hetta er ein lagnustund fyri trygdina í Evropa. Eg eri takksamur fyri álitið, ið stjórnar- og statsleiðarar hava víst mær sum Nato-aðalskrivari, og eg ynski at halga meg fult og fast til at leiða verjusamgonguna gjøgnum hesa krevjandi tíðina, leggur Jens Stoltenberg afturat.
