Í felags tíðindskrivi fordøma limalondini í Arktiska Ráðnum russisku innrásina í Ukraina, og boða harumframt frá, at alt millumtjóða fundarvirksemi steðgar fyribils, meðan ein loysn verður fyrireikað, hvussu Arktiska Ráðið kann halda fram at virka.
Russland hevur annars formansskapin í Arktiska Ráðnum fram til 2023.
Uttanríkismálaráðið skrivar á heimasíðu sínari, at føroyska støðan er at standa saman við samstarvsfeløgum um tey átøk, sum semja er um at seta í verk móti Russland, men eisini at virka fyri at Arktiska Ráðið aftur verður virkisført skjótast gjørligt.
Tíðin er búgvin til Arktiska Ráðið 2.0
– Hóttanum móti Finnlandi og Svøríki úr Russlandi setur meinbogar í vegin fyri arktiska samstarvið, sum snøgt sagt ikki ber til, nú Russland hevur gjørt innrás í Ukraina, skrivar eigarin av miðlinum, Arctic Circle, Alice Rogoff, í einum leiðara.
Hon heldur, at Arktiska Ráðið er við at detta sundur. 25 ár við torførum og hørðum arbeiði at byggja upp eitt grundleggjandi samstarv við Russland í Arktis er skolað í havið vegna kríggið hjá Putin í Ukraina.
Alice Rogoff skrivar í leiðaranum, at hon ivast um Arktiska Ráðið nakrantíð fer at virka á sama hátt sum nú, og tí rør hon uppundir, at tíðin er búgvin til eitt nýtt Arktsiskt Ráð, sum skal vera uttan Russland.
