Bretski vísindamaðurin Stephen Hawking skal jarðast undir liðuni á Sir Isaac Newton og Charles Darwin.
Tað veit bretska blaðið The Guardian at siga.
Stephen Hawking doyði í farnu viku. Hann gjørdist 76 ára gamal.
- Sjálvsagt skal Stephen Hawking leggjast til hvíldar saman við øðrum stórum vísindamonnum sum Sir Isaac Newton og Charles Darwin.
Sigur John Hall, dekanur á Westminster Abbey.
Sir Isaac Newton fór til jarðar har í 1727 og Charles Darwin í 1882. Enn er ikki almannakunngjørt nær Stephen Hawking verður jarðaður.
- Aðrir kendir vísindamenn eru eisini jarðaðir her. Teir seinastu eru Ernest Rutherford í 1937 og Joseph John Thomson í 1940. Vit halda tað vera týdningarmikið at vísindi og átrúnaður arbeiða saman fyri at svara lívsins stóru spurningum.
Sigur John Hall at enda.
