Sergio Busquets verður ikki við til EM-endaspælið, sum byrjar 11. juni. 32-ára gamli Busquets, sum er liðskipari fyri spanska landsliðið, fekk í gjár staðfest koronusjúkuna og er farin heim í sóttarhald.
Tað upplýsti spanska fótbóltssambandið, RFEF, á heimasíðu sínari í gjárkvøldið.
Eingin annar í venjingarleguni hevur eftirfylgjandi havt positiva kanningarroynd, og øll tey, ið hava verið í samband við Sergio Busquets er farin í sóttarhald, upplýsir spanska fótbóltssambandið.
Leikararnir hava fingið boð um at venja hvør sær, og nú byrjar eitt stríð móti tíðini, tí endaspælið byrjar nú fríggjadagin.
Spania skal spæla sín fyrsta dyst í endaspælinum tann 14. juni, tá teir møta Svøríki í Sevilla. Spania er eisini í bólki saman við Póllandi og Slovakia.
Spanski landsliðsvenjarin, Luis Enrique, hevur sum tann einasti venjarin til EM-endaspælið valt sær ein hóp upp á 24 leikarar. Øll hini 23 EM-londini hava úttikið 26 leikarar til hóparnar hjá sær.
Til eitt endaspæl hevur vanligt verið, at eitt landslið kann hava 23 leikarar í endaliga hópinum, men UEFA hevur hesuferð avgjørt, at øll lond kunnu hava tríggjar leikarar afturat í endaliga hópinum vegna koronufarsóttina.
Sambært RFEF, so hevur Luis Enrique inntil leygardagin til at gera broytingar í hópinum.
Sergio Busquets var við til at vinna HM-endaspælið í 2010 og EM-endaspælið í 2012 við Spania. Hann hevur leikt 123 dystir fyri Spania.
Hann hevur vunnið átta sponsk meistaraheitir við Barcelona og Champions League tríggjar ferðir.
/ritzau/