Spælipláss til bygd og bý
“Havnin er ein lítil bygd” yrkir og syngur Teitur Lassen. Ja, í altjóða høpi er høvuðsstaður okkara ikki serliga stórur. Tað skulu vit ikki vera kedd av. Tvørturímóti eiga vit so nógv av hugna, sjarmu og nærleika, sum stórbýir kring knøttin als ikki hava – tó at teirra stødd burdi boðað frá onkrum stórbarum.
Annfinn Hjelm
22. oktober 2024 kl. 19:38
Men eitt er, sum kundi skapt meira hugna og trivnað kring allar býlingar og bygdir í kommununi. Talan er sjálvandi um spælipláss, sum alt ov ofta ongan góðan eiga. Hetta mugu vit gera betur og vil eg virka fyri, at støðið á øllum kommunalum spæliplássum skal vera eins høgt, sum spæliplássið í Grasagarið er – og so er tað sjálvandi púra líkamikið, um spæliplássið er í Kollafirði, Velbastað, á Argjum ella í Hoyvík – góðskan skal vera í hásæti.
Lat okkum tí heldur broyta orðingina í sanginum, til “Havnin er ein hugnalig bygd”. Tá kunnu børn og barnafamiljur trívast enn betur enn í dag.
Um hetta skal vera gjørligt, er neyðugt við einum sterkum Fólkaflokki í Tórshavnar kommunu.
Vel lista A
Vel Annfinn Hjelm
