Høllin við Tjarnir er farin at fyllast, og nú eru bara 10 minuttir, inntil fyrsta bríksl verður í fyrsta týdningarmikla hondbóltsdystinum í nýggju høllini.
Stórur partur av áskoðarunum eru møttir í góðari tíð, og tað er góður rómur í høllini.
Hondbóltssambandið hevur lagt stóra orku í fyrireikingarnar, og tað sær út til, at alt er gingið upp í hægri eind.
-Vit fegnast um nýggju umstøðurnar, og vit fegnast um, at undirtøkan millum áskoðararnar er so stór. Hetta er nýtt fyri landsliðið, sum ikki áður hevur spælt í nýggju høllini. Í høllini á Hálsi hevur tað seinastu árini gingið so væl, og vit hava vunnið dystirnar. Í kvøld er mótstøðuliðið sera væl fyri, men vit rokna við og vóna, at føroyska liðið fer at lyfta sítt avrik á sama hátt, sum at umstøðurnar og talið á áskoðarum er so nógv betur og størri, enn tað nakrantíð hevur verið, sigur Andrass Thomsen frá Hondbóltssambandinum.
