Ein partur av semjuni um donsku fíggjarlógina var, at fólkatingið játtar 2,5 milliónir krónur til Oyggjaleikirnar, sum í 2027 vera í Føroyum.

So skjótt sum Anna Falkenberg fólkatingslimur fyri Sambandsflokkin hevði boðað frá hesum, var orðaskifti, sum vísti, at stórur partur av føroyingum ikki vilja hava, at danskir pengar skulu – uttan at føroyingar hava biðið um tað, verða brúktir til at fíggja Oyggjaleikirnar í Føroyum. Víst varð tá á, at tað ikki lá í kortunum, tá ið Føroyar tóku á seg at skipa fyri leikunum í 2027, at danskir pengar vóru uppi í leikinum.

Nú hevur ÍSF boðað donsku myndugleikunum frá, at danskir pengar ikki skulu brúkast til at fíggja oyggjaleikirnar. Frá góðum keldum veit dimma.fo, at tað í brævi til donsku myndugleikarnar verður boðað frá, at tað bara eru pengar frá føroysku myndugleikunum og frá privatum stuðlum, sum fíggja Oyggjaleikirnar 2027.

Vit vóna at fáa eina viðmerking frá Elini Joensen, forkvinnu í ÍSF.