Tað var eftir øllum at døma vreiði inn á kirkjuna Unification Church, sum elvdi til, at Tetsuya Yamagami í farnu viku skeyt og drap fyrrverandi japanska forsætisráðharran, Shinzo Abe, og kirkjan, hvørs fylgjarar vanliga verða kallaðir Moonies, hevur váttað, at mamma Tetsuya Yamagami var limur í kirkjuni.
Shinzo Abe varð skotin til deyðis av 41 ára gamla Yamagami í farnu viku, og sambært The Guardian hevur Yamagami gjørt greitt, at hóast hann ætlaði at gera av við Abe, var veruliga drápsmálið leiðarin í Unification Church.
Sambært The Guardian hevur Yamagami greitt myndugleikunum frá, at mamma hansara gav kirkjuni eina stóra peningagávu fyri fleiri enn 20 árum síðani, ið elvdi til, at familjan kom í peninganeyð.
Forsetin í Unification Church, Tomihiro Tanaka, hevur greitt frá, at hvørki Abe ella Yamagami vóru limir í kirkjuni, men umvegis videosamskifti sendi Abe kirkjuni eina heilsan í fjør.
Unification Church, ella Family Federation for World Peace and Unification, sum hon eitur, varð sett á stovn í 1954 av suðurkoreanska Sun Myung Moon, og í nógv ár vóru atfinningar um, at talan var meira um eina kult heldur enn eina kirkju.
