Altjóða tónleikaverkætlanin, On Mass, verður fyriskipað av Roundhouse í London, í samstarvi við Norðurlandahúsið og mentanarstovnar í India, Palestina og Brasil.
180 ungir tónleikarar og sirkusartistar, frá øllum heiminum, savnast í Roundhouse í London í eina heila viku, at arbeiða uppá tónleikaverkætlanir. Hetta verður gjørt undir leiðslu av royndum yrkislistafólkum. Verkætlanin endar við einari stórari tónleikaframførslu, ið verður framførd í Roundhouse tónleikasalinum, ið rúmar umleið 1700 fólkum. Heimskendi grammy-vinnarin, Angélique Kidjo, fer at framføra saman við teimum mongu luttakarunum.
Seks føroyingar eru júst farnir til London, at luttaka í hesari verkætlan. Talan er um Beinir Troest Rasmussen, Rasmus Vigant Samuelsen, Guðrið Patursson, Annika Malunardóttir, Eivin Dam Simonsen og Bjørk Sigurðsdóttir Lamhauge.
Framførslan verður sunnudagin 12. november kl 19.30 og kann stroymast live á heimasíðuni hjá The Roundhouse (www.roundhouse.org.uk)
