Tað var ein stór løta mikudagin, tá ið sáttmálin um bygging av nýggjari kirkju á Glyvrum varð undirskrivaður.
Eftir at fyrsta flagið varð loyst av Hans Jacob Lamhauge, fyrrverandi kirkjuráðsformanni, varð bjóðað til drekkamunn í – skjótt – gomlu Glyvra kirkju, har røður eisini vórðu hildnar av millum øðrum Jógvan Fríðrikssyni, bispi, Eiriki í Jákupsstovu, landsstýrismanni og Sigtór A. Petersen, stjóra hjá J&K Petersen.
Vit hjá J&K Petersen taka tað sum ein heiður at sleppa at standa fyri byggingini av hesum serstaka og fyri nærsamfelagið týðandi bygningi.
Sigtór A. Petersen tók eisini soleiðis til í røðu síni:
-Okkara uppgáva er ikki bert at reisa veggir og tekju, men at skapa eitt stað, sum er eitt trygt og friðsælt rúm, sum fer at tæna fólkinum í mong ár framyvir.
Farið verður í gongd við arbeiðið í næstum. Kirkjan verður 1.140 fermetrar til støddar og fer at hava umleið 700 sitipláss. Tað fer at taka góð tvey ár at byggja Glyvra kirkju, og skal kirkjan eftir ætlan verða liðug í februar 2028.
Myndirnar frá degnum hevur Sølvi Reinert Hansen tikið, og SNA hevur teknað kirkjuna.
