Nú er Sandoyartunnilin endaliga góðkendur til at verða tikin í nýtslu í morgin. í dag fekk tunnilin ta seinastu góðkenningina. Tað fekk hann tá ið Landsverk og Arbeiðs- og Brunaeftirlitið hava góðkent Sandoyartunnilin til almenna ferðslu.
Tað er úrslitið av eini umfatandi venjing í Sandoyartunlinum í gjár har ikki færri enn 80 fólk vóru við.
Landsverk og Arbeiðs- og brunaeftirlitið hava gjøgnumgingið projektið, tilbúgvingina og trygdarútgerðina í Sandoyartunlinum.
Men áðrenn Sandoyartunnilin kundi endaliga góðkennast til almenna ferðslu, skuldi trygdarútgerðin í tunlinum roynast í verki í einari stórari venjing.
Venjingin var í gjárkvøldið. Umleið 80 fólk frá Politinum, Tórshavnar Sløkkiliði, Sands Sløkkiliði, Ambulansutænastuni og Landsverki tóku lut í venjingini, sum eftirkannaði ventilatiónsskipanina og samskiftisútgerðina í tunlinum.
Allir partar høvdu egnar eygleiðarar við, sum aftaná skrivaðu hvør sína frágreiðing um venjingina.
Politiið, sum er leiðandi samskipari í tilbúgvingini, tók saman um niðurstøðurnar og hevur góðkent tilbúgvingina í Sandsoyartunlinum.
Landsverk hevur gjøgnumgingið niðurstøðurnar frá venjingini og hevur í dag staðfest, at Sandoyartunnilin lýkur øll myndugleikakrøv og tískil kann lata upp fyri almennari ferðslu.
Arbeiðs- og Brunaeftirlitið hevur somuleiðis brunagóðkent Sandoyartunnilin til almenna ferðslu.
