– Eg veit ikki rættuliga hví eg eri uppsagdur, men kanska formaðurin kann svara tær, segði Hegga Samuelsen við Norðlýsið mánadagin.
Formaðurin í Undrinum, Arnar Lognberg, hevur ikki havt hug at viðmerkja málið, men í dag kunnger felagið, at samstarvið millum Undrið og Hegga Samuelsen, høvðusvenjara hjá 1. deildarliðnum, er endað.
– Vit skulu nýta høvið at takka Hegga fyri hansara tíð í Undrinum. Nógv væntaðu, at Undrið ikki fór at megna at halda seg uppi í 1. deild hetta kappingarárið, men Hegga var ongantíð í iva um tað. Vit skulu somuleiðis ynskja honum blíðan byr og bestu eydnu framyvir, skrivar felagið á sínum Facebook-vanga.
Nevndin í Undrinum skrivar samstundis, at nevndin hevur ikki fleiri viðmerkingar til málið – fyriuttan tað, at arbeitt verður við at finna nýggjan venjara.
Undrið FF liggur í løtuni á einum fjórða plássi í 1. deild við 35 stigum. Tvey stig er upp til Víkingur og triðja plássið.
Næstur dystur hjá Undrinum verður á heimavølli leygardagin móti teimum næstbestu úr NSÍ, ið liggur á næstaftasta plássinum í deildini - og stríðist fyri ikki at flyta niður.
