Støðan er blivin nakað spent millum Russland og Litava, ið er limur í Nato, seinastu dagarnar. Hetta hendir, eftir at Litava hevur valt at seta ES-revsitiltøk í verk, sum millum annað gongur útyvir russiska innlendisøkið í Kaliningrad.
Litava hevur avgjørt, at ongar vørur skulu flytast við toki millum Russland og avmarkaða lítla russiska landumráði í Kaliningrad, ið liggur millum Litava og Pólland.
Russland kallar hetta fyri eitt ólógligt stig, og hóttir við at løna hesum aftur.
Tað skrivar dr.dk.
(Grafikur: Morten Fogde Christensen/dr.dk)
Revsitiltøkini vórðu sett í verk í vikuskiftinum, har øll tok blivu steðgað, sum høvdu vørur á revsilistanum. Talan er millum annað um kol, metallir, byggitilfar og framkomin tøkni.
Forsætisráðharrin í Litava, Ingrida Simonyte, sigur, at Litava hevur ikki ætlanir at víðka revsitiltøkini, men at landið fylgir revsitiltøkunum, sum ES hevur sett í verk móti Russlandi. Tað hevur fingið leiðaran fyri trygdarráðið í Kreml, Nikolai Patrushev, at svara aftur:
– Vit fara at seta tiltøk í verk í nærmastu framtíð, sum fer at fáa stórar avleiðingar fyri fólkið í Litava, verður Patrushev siteraður fyri, sambært dr.dk.
Uttanríkisráðið í Russlandi hevur eisini sent boð eftir litaviska sendimanninum í Moskva, ið skal standa skúlarætt fyri litavisku avgerðini.
Russland krevur, at revsitiltøkini, sum eru sett í verk móti flutningi av vørum millum Russland og Kaliningrad, verða sett úr gildi aftur, ið russiska stjórnin heldur er ólógligt.
