Russland/Írland: Russland hevur boðað Írlandi frá, at russar hava ætlanir at hava eina herflotavenjing í altjóða sjógvi við Írland.
Tað upplýsti írski uttanríkisráðharrin, Simon Coveney, fyri Reuters mánadagin.
Hann legði afturat, at ein tílík venjing ikki verður heilsað vælkomin í økinum, men at Írland einki kann gera fyri at forða Russlandi at hava hernaðarvenjing.
– Tað er ikki í okkara makt at forða tí, men eg havi gjørt tað greitt fyri russiska sendimannin í Írlandi, at hetta hóvar okkum ikki. Hetta er ikki løtan at økja spenningin millum eystur og vestur, segði Coveney.
Ætlaða herflotavenjingin verður væntandi fyrst í februar umleið 240 kilometrar í ein útsynning úr Írlandi í altjóða sjógvi.
Men venjingin verður innanfyri írska loftrúmið, so øll vanlig flogferðsla verður beind burtur frá økinum, har væntaða russiska venjingin verður.
