Rókur eigur metið eina løtu aftrat

Tað er EM fepur í Føroyum og millum allar føroyingar, og sum næstu dagarnir fara, so verður fepurin uppaftur hægri.

Siðvenjan at gera burturúr hagtølum í hondbólti hevur ikki verið tann sama, sum hon altíð hevur verið í fótbólti. Inntil FaroeSoccer sá dagsins ljós, var tað upp til tann einstaka at fylgja við í, hvussu nógvar dystir einstaki spælarin hevur spælt og hvørji feløg hann hevur umboðað. Síðani Marni Mortensen fór at skráseta, hevur tað verið lagaligt at fylgja við, og ivaleyst nýta øll tey, sum skriva um spælarar og hagtøl, FaroeSoccer sum keldu (viðhvørt verður tað nevnt, hvør keldan er).

Nú er tað lagaligari at fylgja við í hondbóltshagtølum. Tað eru teir báðir, Julian Kragesten, stovnari og eigari og Ásbjørn Nattestad, hagtalsskrásetari, sum syrgja fyri, at tað ber til at fylgja við á heimasíðuni

https://handballstatz.com/

Á síðuni sæst, at Rókur Akralíð er tann, sum hevur verið oftast á manslandsliðnum. Hann er skrásettur fyri at hava spælt 57 landsdystir. Honum næstir eru Tróndur Kragesten 55, Hanus Joensen 54 og Hans Áki Dal-Christiansen 53 dystir.

Av tveimum, sum týsdagin fara til Berlin at luttaka í EM endaspælinum, hevur Peter Krog spælt flestar landsdystir. Dystartalið hjá honum er 42. Kjartan Johansen hevur spælt 40 landsdystir, og teir næstu á listanum eru Jónas Gunnarsson Djurhuus 37 og Helgi Hildarson Hoydal, Allan Norðgerð, Rói Berg Hansen og Nicholas Satchwell, sum saman við Hans Eli Sigurbjørnsson hava spælt 34 landsdystir.

Hanus Joensen er framvegis besti málskjútti á landsliðnum. Máltalið hjá honum er 238. Honum næstu er sonur hansara Heini Hanusarson, sum hevur skorað 205 mál. Ingi Olsen er á triðja plássi við 153 málum.