Nýggjur sáttmáli er undirskrivaður millum Føroya Pedagogfelag og arbeiðsgevararnar, sum fevna um Konnunala Arbeiðsgevarafelagið og Lønardeildina hjá Fíggjarmálaráðnum.
Tað boðar Føroya Pedagogfelag frá á facebookvanga sínum. Talan er um tríára sáttmála.
Sanna á Løgmansbø sigur í samrøðu við útvarpið hjá Kringvarpinum, at við lønarlyftinum og nýggja sáttmálanum er talan um góða lønarhækkan fyri bæði pedagogar og hjálparfólk.
Sanna á Løgmansbø sigur, at strategiin hjá nýggju nevndini var at byrja av nýggjuum eftir nevndarvalið, sum var fyrr í vár. Tá vóru samráðingarnar á veg til semingsstovnin, men nú er semja undirskrivað uttan semingsstovnin.
Felagið skrivar soleiðis:
Góðu limir
Vit hava fyri løtu síðani undirskrivað semju við Fíggjarmálaráðið og Kommunala Arbeiðsgevarafelagið.
Fyri fyrstu ferð í langa tíð hevur Pedagogfelagið undirskrivað semju uttan semingsstovnin, og boðar hetta frá jaligari arbeiðsgongd millum partarnar.
Í morgin er álitisfólkafundur og vit gleða okkum til ein góðan fyrrapart saman við teimum.
Vit ynskja tykkum øllum framhaldandi góðan dag.
Heilsan
Nevndin
