París-ferðin hjá Team Rynkeby byrjar í morgin

Súkklað verður frá Helnabrekku klokkan 11.15, men áðrenn fráferðina verður skipað fyri hugnaløtu við tónleiki, røðum og ábiti. Børn úr dagstovninum Blákollan selja myndlist, og lata stuðulin til Team Rynkeby. Eisini verða tvær gávuhandanir.

Hetta skrivar heimasíðan hjá Klaksvíkar kommunu í dag.

Tiltakið byrjar klokkan 10.30. Karl Johansen, borgarstjóri, og Sigrun Niclasen, umboðandi Team Rynkeby, halda røður, og aftaná verður bjóðað kaffi og lagkøka í Smæruni. Eisini verður okkurt gott til børnini. 

- Øll eru hjartaliga vælkomin, skrivar Klaksvíkar kommuna.