Óvæntað úrslit spøkja alla tíðina

Bólturin er rundur, og hóast favorittarnir verða roknaðir at vera stórir, so er tað ikki altíð, at teir megna at lyfta uppgávuna.

Hetta varð staðfest í kvøld, tá ið fjórða umfar í Betri deildini var á skrá.

Meistararnir og FM favorittarnir í Klaksvík løgdu sjógv millum seg og hini liðini, sum vera roknað at vera FM favorittar.

KÍ vann tryggan 2-0 sigur á Argjum, og KÍ hevur framvegis fulla úrtøku.

Mest óvæntaða úrslitið var í Trongisvági, har tað endaði málleyst millum uppflytaran TB og HB, sum tað annars hevur gingið væl hjá í trimum teimum fyrstu umførunum.

Víkingur snávaði fyri aðruferð í ár. Í fyrsta umfari tapti Víkingur 3-0 á heimavølli ímóti B36, og í kvøld endaði tað 3-3 í oyggjauppgerðini á Svangaskarði millum B68 og Víking.

B36 lá góða løtu undir á heimavølli ímóti 07 Vestur, sum var ógvuliga væl við í fyrra hálvleiki, og sum kundi havt økt um 1-0 leiðsluna. Eftir at hava skift fleiri spælarar út reisti B36 seg og vann 3-2 og er nú á triðja plássi.

ÍF vann 3-0 á heimavølli ímóti EB/Streymi, og fuglfirðingar hava longu vunnið seks stig, ið er sama stigatal, sum EB/Streymur hevur.

ÍF – EB/Streymur 3-0 (1-0)

1-0: Elias J. Lervig 45.

2-0: Karl Løkin br 73.

3-0: Gundur E. Petersen 82.

B68 – Víkingur 3-3 (2-1)

1-0: Ragnar Samuelsen 1.

1-1: Jákup Johansen 4.

2-1: Mohamed Samba 23.

2-2: Olaf Bárðarson 59.

3-2: Villiam Emil Klein 68.

3-3: Sølvi Vatnhamar 73.

B36 – 07 Vestur 3-2 (0-1)

0-1: Daniel Obbekjær 19.

1-1: Isak Frederik Jönsson 67.

2-1: Benjamin Heinesen 73.

3-1: Michal Przybylski 79.

3-2: Oddur í Haraldstovu Petersen 91.

AB – KÍ 0-2 (0-2)

0-1: Jóannes Kalsø Danielsen 9.

0-2: Sjálvmál 41.

TB – HB 0-0

Sunnudagin 16. apríl

KÍ – Víkingur

B68 – EB/Streymur

HB – ÍF

AB – B36

TB – 07 Vestur