Nú er tað greitt, hvuussu teir seks bólkarnir í innleiðandi umfarinum í EM endaspælinum í fótbólti næsta summar vera mannaðir.
Kappingin verður í Týsklandi í juni og juli. Fyrsti dystur verður millum Týskland og Skotland. Hann verður 14. juni, og finalan verður neyvt eina mánað seinni – 14. juli.
Tá ið Føroyar ikki eru við í hesum endaspælinum, er áhugin ivaleyst stórur fyri, hvørji mótstøðuliðini eru hjá Onglandi og hjá Danmark.
Í EM endaspælinum í 2021 hittust Ongland og Danmark í aðrari hálvfinaluni. Lutakastið í dag lagaði tað soleiðis, at Ongland og Danmark eru í bólki saman. Hini bæði eru grannarnir á Balkan Slovenia og Serbia. Hesi hittast í bólki C.
Bólkur B sær øgiligur út. Har eru tað Spania, Albania, Kroatia og Italia, sum fara at dystast.
Tvey tey bestu í hvørjum av teimum seks bólkunum og fýra teir bestu tríararnir halda fram í kappingini.
Higartil er tað bara Danmark av norðurlendsku tjóðunum, sum hevur tryggjað sær pláss í endaspælinum. Ísland og eisini Finnland fara í mars at vera partur av finaluumfari, har spælt verður um pláss í endaumfarinum. Tá fer Ísland at spæla ímóti Ukraina, og so fer vinnarin av tí uppgerðini at spæla ímóti vinnaranum av Ísrael og Bosnia. Finnland fer at spæla ímóti grannunum í Estlandi, og so fer vinnarin av tí uppgerðini at spæla ímóti vinnaranum av uppgerðini millum Pólland og Wales.
Bólkur A: Týskland, Ungarn, Skotland og Sveis.
Bólkur B: Spania, Albania, Kroatia og Italia.
Bólkur C: England, Danmark, Slovenia og Serbia.
Bólkur D: Frakland, Eysturríki, Holland og Pólland/Wales - Finnland/Estland).
Bólkur E: Belgia, Rumenia, Slovakia og Ísrael/Bosnia – Ukraina/Ísland.
Bólkur F: Portugal, Turkaland, Kekkia og Grikkland/Georgía - Luksemborg/Kasakstan
