Nýggj tøl frá Ríkissjúkrahúsinum vísa, at tey ókoppsettu eru ein lutfalsliga stóru bólkur av teimum, ið verða so sjúk av koronu, at tey hava tørv á at verða innløgd.
Ríkissjúkrahúsið skrivar á heimasíðuni, at hóast tey ókoppsettu eftirhondini eru ein øgiliga lítil partur av vaksna fólkinum í Danmark, telja tey fyri meira enn helvtina av teimum, sum liggja á intensivu deild.
Tølini eru almannakunngjørd í Dansk Intensiv COVID-19 rapport, sum er gjørd av Regionernes Kliniske Kvalitetsudviklingsprogram.
Tølini vísa, at tilsamans 113 sjúklingar vórðu innlagdir á intensivu deild í november mánaði, og data um koppseting fekst til vega av 76 teirra. Og koppsetingardataið vísir, at 57 prosent av teimum vóru ókoppsett.
- Tað er greitt, at tann relativt lítli bólkurin av danskarum, sum ikki eru koppsettir móti Covid-19, fylla lutfalsliga nógv millum tey innløgdu á intensivu deild. Tað er púra greitt, at koppsetingarnar verja móti álvarsamari Covid-sjúku, sigur Nicolai Haasa, yvirlækni á Ríkissjúkrahúsinum, sum er ein teirra, ið hevur latið úr hondum frágreiðingina.
Frágreiðingin vísir eisini, at talið á sjúklingum á intensivu deild er lægri, enn tað var í februar mánaði. Fyrsta februar vóru 91 sjúklingar á intensivu deild, meðan tað talið 6. desember var 67. Hinvegin vísir frágreiðingin, at trýstið á intensivu deild er størri, en tað var í februar.
6. desember vóru bert 10 tøk pláss á intensivu deild, meðan tað í tíðarskeiðnum 1. februar til 21. juni vóru í miðal 77 tøk pláss á intensivu deild á sjúkrahúsunum í landinum.
- Vit hava ikki tann kapasitetin á intensiva økinum, sum vit gjarna vilja hava. Tí vit mangla starvsfólk, sigur Rasmus Møgelvang, varastjóri á Ríkissjúkrahúsinum, við heimasíðuna.
