Ógvusligt monsunregn í suður Asia
Tað er ikki bara í Texas, at har er ruðuleiki orsakað av regni
Guðrun í Jákupsstovu
30. august 2017 kl. 15:30
Nógvastaðni í India, Bangladesh og Nepal er yvirflóð vegna ógvusligt monsunregn. Tað skrivar bretska blaðið, the Independent.
Umleið 1200 fólk eru deyð, og milliónavís hava mist hús og heim í ógvusliga monsunregninum. Hetta er sokallaða "regnárstíðin" í suður Asia, og vanligt er at tað regnar nógv í mánaðum frá juni til september. Men í ár ber av.
Regnið hevur rakt eina rúgvu av fátøkum bygdum í teimum ymsu londunum, og tískil er støðan sera ring. Íbúgvarnir hava lítlan møguleika at bjarga sær mat og reint vatn í ruðuleikanum.
Sambært the Independent, meta serfrøðingar, at ógvusliga monsunregnið kann setast í samband við mannaskaptar umhvørvisbroytingar.
