Ikki gerast bilsin, um eitt barn kemur gangandi við mammuni ella pápanum í bandi, ella um tú hoyrir ræðuskríggj úr einum króki, tá tú ert á vitjan í Norðurlandahúsinum í vikuskiftinum 19/2-21/2. Alt húsið verður nevniliga gjørt um til stórt listaspæl, har luttakararnir reika runt úr staði til stað fyri at royna tey ymsu listaspølini, og hetta fer ikki at ganga stillisliga fyri seg, skrivar Norðurlandahúsið í einum tíðindaskrivi.
Við hvønn postin fáa luttakararnir vegleiðing og tilfar, og so er bara at koma í gongd við til dømis at mála oyrað grønt, skríggja sum eitt ørt ella gera ein skulptur burturúr tugdum keksum. Nøkur av verkunum eru ikki heilt ung og stava frá listafólkum sum Yoko Ono og Marina Abramović, meðan onnir eru nýggj og eru bíløgd til endamálið frá norðurlendskum listafólkuum, til dømis Goodiepal og Anna Berndtson.
Spælið, ið eitur Playing Up, leggur eisini upp til eina virkna listauppliving, og kunnu luttakararnir bjóða sær sjálvum og øðrum av.
Tað er Live Art Danmark, ið stendur handan Playing Up. Teir savna seg um at breiða list út til børn og ung og hevur spælið áður verið á Copenhagen Contemporary í Keypmannahavn.
Hentar upplýsingar:
Tilmelding fer fram á nlh.fo. Tilmeldað verður í bólkum (tveir-seks persónar)
Prísur: 100 krónur fyri hvønn bólk
Longd: Tveir tímar eru settir av til spælið
Aldursmark: Spælið er ætlað øllum yvir fýra ár. Børn undir 12 ár skulu meldast til saman við einum vaksnum.
Trygd
Norðurlandahúsið tekur trygdina í stórsta álvara og fylgir tilmælunum frá myndugleikunum um frástøðu. Tí ber til hjá hvørjum bólki at halda tveir metra frástøðu til hvønn annan.
