Á býráðsfundi í farnu viku samtykti býráðið í Eysturkommunu at játta gott og væl 4 milliónir krónur, soleiðis at nýggja neystið kann stoypast upp og innilokast í ár vónandi, og síðani verður restin av kostnaðin væntandi játtaður komandi ár, soleiðis at nýggja kappróðrarneystið kann standa klárt í 2025.
Í verandi løtu venja róðrarfólkini í Leirvík vetrarhálvárið, men tá ið farið verður í bátarnar verður vant á Gøtuvík.
Trupult hevur verið at fingið pláss til teir sjey bátarnar hjá felagnum undir taki, og sum nú er standa tríggir teirra í einum neysti í Norðagøtu, meðan hinir fýra standa í bingjum á havnalagnum í Gøtu.
Nýggja neystið fer at hava góð og nýmótans venjingarhølir og umklæðingarrúm, umframt pláss til upp til sjey bátar: trý fimmmannafør, tvey seksmannafør, eitt áttamannafar og eitt tíggjumannafar.
