Í samband við kommunuvalið, sum verður í november, hevur Dimmalætting sett øllum borgarstjórum í landinum nakrar spurningar.
Her svarar Torbjørn Jacobsen, borgarstjóri í Runavíkar kommunu:
Hvat avrik í hesum valskeiðnum er tú fegnast um?
- Fegnist um mong avrik, m.a. dansistovuna í Funningi, men nýggja svimjihøllin í Runavík, størsta verkætlan í kommununi nakrantíð, er sjálvandi meginavrikið. Hon verður liðug næsta vár.
Hvat mál, sum ikki eydnaðist at loysa í hesum valskeiðnum, iðrar tú teg mest um?
- Vit hava rikið kommununa javnsvarandi við fíggjarligu orkuna, og tí fái eg ikki iðrað meg um nakað, sum ikki er gjørt.
Hvat er størsta málið, sum er fyri framman, í komandi valskeiði?
- Tað er bygging av dagstovni og skúla, sum eru undir fyrireiking.
Stillar tú upp aftur á komandi kommunuvali?
- Havi sitið í sessinum í skjótt níggju ár, og kann ætla, at tey flestu ynskja sær eitt skifti við borðendan. Annars er ongin áheitan komin um uppstilling, somikið lættari er valið.
