Nú skulu fólk fáa greið boð um hvat tey betala í ómaksgjøldum

Øll tey føroysku lívstryggingarfeløgini og eftirlønargrunnarnir hava nú gjørt eina avtalu um betri kunning til hvørt einstakt viðskiftafólk um teir kostnaðir, tey betala fyri sína eftirlønaruppsparing

Avtalan er ímillum

·  P/F Tryggingarfelagið Lív

·  P/F Betri Pensjón

·  Eftirlønargrunnur Løntakaranna (Lívsverk)

·  P/F NordikLiv Lívstryggingarfelag

Tryggingareftirlitið sigur, at avtalan merkir, at einaferð um árið skal felagið upplýsa hvønn einstakt viðskiftafólk um, hvussu nógv tað hevur betalt, bæði í krónum og í prosentum fyri sína eftirlønaruppsparing.

Feløgini hava bundið seg til at brúka sama uppgerðarhátt, soleiðis at tølini kunnu samanberast, og grannskoðararnir skulu tryggja, at feløgini halda avtaluna.

Avtalan kemur í gildi soleiðis, at í seinasta lagi 1. september skal hvørt einstakt viðskiftafólk fáa upplýst, hvussu nógv tað hevur goldið í krónum og í prosentum fyri sína eftirlønaruppsparing í fjør.

Avtalan fevnir ikki um eftirlønaruppsparing í peningastovnum.

Endamálið við skipanini er, at tað skal vera greitt, hvørjar kostnaðir viðskiftafólk betala fyri at hava sína eftirlønarskipan.