Tórshavnar kommuna boðaði í gjár frá, at neyðugt var at lata 15 dagstovnar aftur. Orsøkin er tann, at nú verkfall er, verður onki rusk heintað, og mett verður, at smittuvandi kann standast av, um ruskposar og annað hópar seg upp uttanfyri bingjurnar. Harumframt sleppa fuglur og skaðadjór eisini framat ruskinum, og kann hetta eisini vera smittuvandi.
Í dag boðar kommunan frá, at átta dagstovnar afturat lata aftur í morgin. Hetta vil siga, at raktu stovnarnir lata ikki upp í morgin. Kommunan skrivar eisini, at foreldur og verjar, ið hava børn á stovnum, ið lata aftur, fáa boð gjøgnum Foreldragluggan í dag.
- Dagstovnarnir lata upp aftur, tá rusk aftur verður tikið. Teir dagstovnar, ið ikki hava trupulleikar við ruski, hava opið so longi rusk rúmast í bingjunum. Um støðan broytist á hesum stovnum, verður kunnað um hetta, skrivar Tórshavnar kommuna.
Stovnarnir, ið lata aftur í morgin eru:
Býlingshúsið Millum Gilja
Býlingshúsið Inni á Gøtu
Býlingshúsið á Norðasta Horni og Ungdómshúsið í Vesturbýnum
Dagstovnurin á Hamrinum
Dagstovnurin á Argjum
Dagstovnurin í Hoyvík
Dagstovnurin Kura (Vøggustova og barnagarður við Botnánna)
Frítíðarskúlin Smílibýlið
