27. september boðaði StÍF frá, at venjarin, sum tók við starvinum fyrst í august, ikki longur var venjari. Í trimum teimum fyrstu umførunum í landskappingini vann StÍF einki stig, og so segði venjarin seg úr starvi.
Tá varð avtala gjørd við hjálparvenjaran Mads Lindkvist um, at hann skuldi taka við sum høvuðsvenjari, meðan nevndin arbeiddi við at finna aðra loysn so skjótt, sum tað ber til.
Nú boðar StÍF frá, at nýggj loysn er funnin.
Í gjár, 12. oktober, vóru 81 ár síðani, at Stranda Ítróttarfelag varð stovnað, og á 81 ár stovningardegnum boðaði felagið frá nýggju loysnini á venjaraspurninginum.
StÍF skrivar soleiðis:
Jesper nýggjur venjari hjá StÍF
StÍF og Jesper Bak hava nú gjørt avtalu um samstarv hetta kappingarárárið. Hann fer til verka beinanvegin.
Jesper er nýggjur høvuðsvenjari hjá besta mansliðnum hjá StÍF. Hann verður eisini høvuðsvenjari hjá øllum dreingjaliðunum. Mads Lindkvist heldur fram sum hjálparvenjari hjá mansliðnum.
Ein týðandi partur av arbeiðinum hjá Jesper er at menna og kveikja verandi og nýggjar venjarar.
Jesper er 38 ára gamal og er úr Danmark. Hann hevur drúgvar og fjølbroyttar royndir sum venjari hjá bæði børnum og vaksnum. Hann var venjari hjá børnum og vaksnum í 11 ár í felagnum Ajax København. Jesper hevur síðan 2022 til fyri stuttari tíð síðan verið høvuðsvenjari hjá mansliðnum og dreingjaliðunum hjá VÍF.
Um nýggja samstarvið við StÍF sigur Jesper:
“Eg gleði meg at byrja sum venjari í StÍF. Tað eru rættiliga stórir møguleikar og tilfeingi í felganum, og eg gleði meg at vera við til at gera møguleikar til veruleika og at vera við í menningini, sum er í felagnum. Hjá mansliðnum ræður nú um, eftir turbulenta byrjan, at skapa ró um liðið, og at finna trúnna á, at tingini kunnu eydnast. So skulu vit nokk venda skútuni.”
StÍF fegnast um hetta nýggja samstarvið við Jesper og bjóðar honum hjartaliga vælkomnum í felagið.
