Nú fáa eisini føroyingar størri ræði á sínum egna lívi, og um teir vilja liva, ella doyggja, verða teir raktir av álvarsligari sjúku, ella álvarsligari vanlukku.

Skjótt fer tað nevniliga eisini at bera til hjá føroyingum at skriva viðgerðar-testamenti.

Hetta er eitt danskt málsøki og tað hevur verið galdandi í Danmark í eina tíð. Men á nýggjárinum verður hetta eisini sett í gildi í Føroyum

Í einum viðgerðar-testamenti kunnu sjúklingar gera av um teir, í ávísum førum, ikki vilja hava framhaldandi viðgerð, við tí avleiðing, tað hevur við sær.

Her verður hugsað um sjúklingar, sum verða so álvarsliga sjúkir, at teir ikki sjálvir eru førir fyri at taka avgerð um tað.

Talan kann eisini verða sjúklingar, sum verða so illa skaddir í eini ferðsluvanlukku, ella sum verða so dementir, at teir ikki ikki eru førir fyri at taka eina slíka avgerð sjálvir, um teir vilja hava viðgerð, ella ikki.

Tað merkir, at tá ið kunngerðin er komin í gildi, kunnu fólk, ímeðan tey enn eru frísk, og við fult vit, fara til ein lækna og skriva eitt viðgerðar-testamenti.

So er testamentið galdandi frá teirri løtu, tað er skrásett í talgildu heilsuskipanini og verður tikið fram, skuldi tað hent, at tey verða so vánalig, at tey ikki eru før fyri at taka eina avgerð sjálvi.

Men hóast fólk hava skrivað eitt viðgerðar-testamenti, kunnu tey altíð fara aftur til lækna og ógilda tað aftur.

Men verða fólk sjúk, kunnu tey eisini altíð taka testementið aftur. Men tá skulu tey gera púra greitt og eintýðugt, fyri heilsustarvsfólki, at tað skal ógildast.