Semingsmaðurin, Terje Sigurðsson, hevur í kvøld boðað Føroya Arbeiðsgevarafelag og Havnar Arbeiðskvinnufelag frá, at Semingsstovnurin gevst við semingsroyndinu uttan at leggja eitt semingsuppskot fyri partarnar-
Stutt eftir boðunum frá Semingsstovninum boðaði Havnar Arbeiðskvinnufelag frá, at tær fara í verkfall frá týskvøldinum á midnátt. Sostatt eru øll arbeiðarafeløgini í verkfalli frá á midnátt týskvøldið.
Arbeiðssteðgurin fevnir um allar limir hjá Havnar Arbeiðskvinnufelag, ið eru settir eftir sáttmála millum Føroya Arbeiðsgevarafelag og Havnar Arbeiðskvinnufelag, har skrivlig avtala ikki er gjørd um undantak fyri arbeiðssteðginum, sigur Vinnuhúsið í kvøld.
Føroya Arbeiðsgevarafelag ger vart við, at tey, sum fara í verkfall, eru starvsfólk, sum eru fevnd av felags sáttmálanum ímillum Føroya Arbeiðsgevarafelag og Havnar Arbeiðskvinnufelag. Sum dømi kann nevnast, at ein arbeiðari, sum er settur sambært handverkarasáttmálanum, ikki er fevndur av arbeiðssteðgi hjá arbeiðarafeløgunum.
Lærlingar, næmingar og praktikantar eru ikki fevndir av einum verkfalli og skulu møta sum vanligt.
Starvsfólk, sum ikki eru limir í einum av teimum fimm arbeiðarafeløgum, eru ikki fevnd av verkfallinum, og hava skyldu at møta til arbeiðis sum vanligt.
