Sunnudagin verður ein forvitnisligur norsku heimildarfilmur um Føroyingahavnina vístur í Norðurlandahúsinum
"Da vi var på Grønland" sigur søguna um Føroyingahavnina, eisini kallað Nordafar, í Vesturgrønlandi, um byggingina og lívið har, til hon varð niðurløgd í 1989. Tá hevði støðin verið virkin í 40 ár.
Tað var norska AL Utrustning, danska Ascrico og føroyska Grønlandsfelagið, sum róku Føroyingahavnina.
Søgan verður fyrst og fremst lýst við norskum brillum, men føroyska søgan hevur eisini fingið pláss í filminum.
Í filminum eru nógv filmsklipp, ið ikki hava verið at sæð alment áður.
Leikstjóri er Kirsti Dale úr Ålesund. Hon hevur sjálv búð eitt stutt tíðarskeið í Føroyingahavnini saman við familjuni. Pápi hennara, Jon Dale, var velferdssjef í 'Norske Velferdshuset' í 1950-unum og 60-unum.
Kirsti Dale verður sjálv eisini við til frumsýningina.
Filmurin, sum er 105 minuttir, er á norskum, men uttan undirtekstir.
Tað er ókeypis atgong, men neyðugt er við tilmelding á nlh.fo.
Kelda: Norðurlandahúsið
