Norra fer í næstum at lata 450.000 skamtar av AstraZeneca til láginntøkulondini Nikaragua, Uganda og Haiti, ið júst nú uppliva triðju bylgju av koronafarsóttini, men mangla koppingarevni.
Bert fimm prosent av fólkinum í Nikaragua, Uganda og Haiti eru blivin koppsett. Tað skrivar norska kringvarpið, NRK.
Harumframt hava fransar, svenskarar og íslendarar eisini ætlanir at lata skamtar av koronukoppingarevni til COVAX-samarbeiðið í næstum, men enn er ikki alment, hvussu nógvar skamtar hesi londini ætla at lata.
Heimsheilsustovnurin, WHO, mælti í mai teimum ríku londunum til at lata koppingarevni til COVAX-samarbeiðið. COVAX er ein koppsetingarsamgonga, ið WHO hevur sett á stovn fyri at tryggja, at tey fátæku londini eisini kunnu fáa nóg mikið av koppingarevnum.
