Norðingur vann fyri fyrstu ferð á ólavsøku

Tað gekk skjótt og væl at avgreiða kappróðurin á Havnarvág í dag. Líkindini vóru góð at rógva, og veðrið var milt, hóast tað í løtum kendist eitt sindur úr honum.

Í fleiri kappingum var tað greitt undan ólavsøkuni, hvør var FM vinnari.

Í dag vunnu allir meistararnir uttan tveir.

Annar var í barnaróðrinum hjá gentum. Títlingur hjá Havnar Róðarfelag vann í dag, og Skansin vann FM.

Hin kappingin, har tað var annar vinnari á ólavsøku enn føroyameistarin, var í kappingini millum 10-mannaførini. Klaksvíkingur er FM vinnari, men í dag var tað Norðingur, sum vann, meðan Klaksvíkingur endaði næstfremst.

Sigurin hjá Norðingi var søguligur á tann hátt, at hetta var fyrsta ferðin yvirhøvur, at Norðingur hevur vunnið á ólavsøku.

Hvalurin av Eiði vann kappingina millum 6-mannaførini við monnum, og Hvalurin er FM vinnari í hesi kappingini. Hetta er fyrsta ferðin yvirhøvur, at tey á Eiði hava vunnið FM í kappróðri.