Leingi sá út til, at Jan Højgaard, sitandi formaður í Føroya Fiskimannafelag, ikki fór at fáa nakran mótkandidat til sessin, nú formansval er í vetur.

Men tá freistin at stilla upp var úti á middegi í dag, leygardagin 4. desember, var kortini greitt, at veruligt val verður í Fiskimannafelagnum, tí Mortan Berjastein úr Fuglafirði stillar upp ímóti honum.

Mortan Berjastein er fyrrverandi sýsluformaður í Eysturoynni fyri Føroya Fiskimannafelag - tað eru teir seks sýsluformenninir, sum saman við felagsformanninum mynda nevndina í felagnum. Hann stillaði ikki upp aftur til sýsluformansvalið seinast.

Formansval er triða hvønn vetur í Føroya Fiskimannafelag. Freistin at stilla upp er fyrst í desember, og síðan verða atkvøðuseðlar sendir út til limirnar. Hesir skulu so verða grannskoðara felagsins í hendi síðst í januar, soleiðis at teljast kann upp og valdi formaðurin útnevndast at taka við 1. februar.

Jan Højgaard, sum er av Nesi í Eysturoynni,  vann formanssessin fyrstu ferð á valinum veturin 2006-2007, og hevur sitið í honum síðan.